كنافة بكاشة

07-02-2007, 04:52 PM

السلام عليكم ورحمة الله وبركاته

كيفكم وش أخباركم وش علومكم وش لونكم .. أتمنا لونكم يكون أبيض .. مع إضافة قليلاً من السمار

المقادير <- بسم الله عليك

طبعاً قبل ما أبدأ في طبختي الي أخترعتها أنا .. اسمها كنافه بكاشه

أنا وطبختي طلعنا كلنا بكاشين

1\علبة قشطه <<< استن ياخي

أول شيء نصيحه الي يبي يسوي الطبخه .. يدخل المطبخ في الليل .. مثلي وتخلي النور طافي

خاصه الشباب .. ما أدري اذا امهاتكم مو مثل أمي .. لأن دخول المطبخ محرم علي

والسبب إن مطبخنا في يوم من الأيام كان عامر بالمأكولات والمعلبات والخضار والفواكه << كان قبل دخولي للمطبخ

عاد افهموها

المهم ما علينا نبدأ بالأشياء الي لازم تجيبونها عشان تسوون الطبخه

2\كيس عيش التوست <<< والله ان صفقتك بالكيبورد على راسك اركد

المقادير :

1\علبة قشطه

2\كيس عيش التوست

3\ قلب زبده صغير

شوييه قرفه .... هيل ( ما انصحكم بها ترى حاره الي ما يبي لا يحط ) .. ملعقة سكر

الطريقه :

افتح الثلاجه .. لا تفتحها كلها ما يحتاج .. افتح شوي على قد يدك ودخل يدك وخذ الزبده

وافتح الغلاف الي عليها انتبه تحطها ع النار من غير ما تفك الغلاف

وحطها في قدر .. واذا ما عندك روح اشتر قدر .. ولازم نفس القدر الي في الصوره .. ونفس المقاس << ؟؟

افرك التوست باصابعك وجيب خوانك الصغار يساعدونك .. عاد ما بيصدقو دام فيها تخويس

ولخبط معها السكر والقرفه

وصب عليها الزبده

لخبطهم بيدك الين تصير ملخبطه تمام

بعدين حط نصها في طاوه ( القلايه .. المقلاه .. الي يسوون فيها الكيك والأشياء ذيك ) << شفها في الصوره اذا ما فهمت

لخبط القشطه والقرفه والسكر وصبها على وجه الطبقه الاولى من التوست

حط الطبقه الثانيه من عيش التوست على اللخبطه

بعدين حطها في الفرن

وعلى ما تجهز انت استغل الوقت وسو الشيره ( الوقت من ذهب إن لم تقطعه قطعك )

المقادير :

مويه وسكر ونص ليمونه وحطها على النار الين تشوف شكلها رهيب زي الي في الصوره << عجبته

طلع اللخبطه من الفرن واقلبها على صحن ثاني ورش فوقها الشيره

تبي نصيحتي ؟ عشان تصير واد كوول

حط عليها فستق او اللوز الحجازي المحمص بكيفك

ولخبطه هنيه على قلوبكم

مع تحيات .. الطباخ سواح

الي يبي اوقع لا يستحي

على فكره .. أنا الي بفوز .. للمعلوميه يعني

والي بيعترض أو ما يصوت لي باصكه بالكيبورد على جبهته

07-02-2007, 08:14 PM

وعليكم ورحمة الله وبركاته

واااااااااااااااااااااااااااااااااااااااااااااااو

سواح انتج حاجه مصيييييييييييييييييييبه

ههههههههههههههههههههههههههههههههههههههه

<< بتنضرب

الحين اسالك اقلك وش الكنافه الكذابه تطلع حلى عيش السرايا

مالت عليك

شكلها لذيذ

تسلم يدك

مابي اصوات عندك مانع

تصويتي لك زي وجهك

ههههههههههههههههههههههههههههه

<< يتنضربي مافي فكه

يعطيك العافيه يارب

تصوتي لك خيو ممتاز

ولاتزعل

تقبل مروري

07-03-2007, 09:26 AM

وعليكم السلام ورحمة الله وبركاته

اش اش

حركتات سواح وطبخ

بس شكلك مسوي الاكله بخيمه ليه ظلام كده

طريقه واضحه ومجهود تشكر عليه اخوي سواح

صراحه تسلم الايادي الله يعطيك العافيه

07-03-2007, 09:33 PM

ربـــي يعطــــيك الف عافيــــهــ ...

اخوي .. سواحــ ....

مجهـــود تشكــــر عليـــهـــ وكنت انتظــــر مشاركتكــ

وبجـــد الكنافــــه تهبــــــل ..

والخطوات واضحـــهــ وحلـــوهـــ

والاحلـــى ملاحظاتـــك ...

ماشاء اللهــ عليـــك .. واثقــ

ههههههههههههههه

انا قعــدت ساعهـــ افكــر واحلـــل فمعنى كلمـــة بكاشـــهــ

بس تذكــرت ان بعض الاعضاء ترجمولــي اياها فيوم من الايــام ..

واتمنـــالك كــل التوفيـــق ان شاء اللهـــ

والله يكتبلك .. جولهـــ في المرحلــه الثانيـــهـــ ... بس اذا فزت .. الجايزهــ

النــص بالنــص

تسلم مره ثانيـــهـــ وان شاء الله الاعضاء يصوتولك

دمت بود

اختك

هذي انـــا

07-05-2007, 01:18 AM

.

..

.. ههههههههههههههههههههههه مو مصدق ان سواح دخل المطبخ ..

.. لا مو معقول هههههههههه من جد والله مو مصدق ( قاعد احك موخي سواح تهور ودخل المطبخ )

.. احس يوم دخلت المطبخ مجهز الاتصال على الدفاع المدني هههههههههههههه ..

.. سواح افضحك اقول وش سويت هههههههههههههههههههههه ..

.. سواح قول لهم انك جيت عندي وقلت عطني الوصفه عشان تسويها وكل شوي ..

.. وانت تتصل عليه وتقول وش احط وش اسوي وطفشتني هههههههههه ..

.. بس الحمد لله انك تعلمت شي جديد وكمانه مني يعني استفدت من خبراتي في الطبخ ..

.. سواح انا خلال الايام الجايه بكون عزابي الله لا يهينك تساعدني ..

.. ولا فيه فكره حلو وش رايك انا وانت نسوي كتاب طبخ نخلي عنوان الكتاب ..

.. ( طبخات من ايد سواح وانا سعودي بقرب الدفاع المدني ) هههههههههههههه ..

.. يعطيك العافيه اخوي تم اضافة تصويت لك خيوو وبتوفيق ان شاء الله ..

.. تقبل خالص شكري وتقديري ..

.. دعواتي ترافقك ..

..

.

مشاهدة نتائج الإستطلاع: اطعم الطبخه وقلي رايك ... ( ملاحظه: الإجابة الأولى إجباريه )
تجنن	10	83.33%
موش بطاله	0	0%
زي وجهك	2	16.67%
المصوتون: 12. أنت لم تصوت في هذا الإستطلاع

الإهداءات
إضافة إهداء